Axentes da Policía Nacional adscritos á Comisaría Provincial de Lugo, encargados da investigación dos delitos relacionados coa saúde pública, detiveron a un sexagenario veciño da cidade con antecedentes por tráfico de drogas e interviñéronlle 300 gramos de cocaína.
Segundo informou a Policía Nacional, as investigacións que se iniciaron hai máis de dous anos tiveron que ser interrompidas en varias ocasións, xa que o agora detido cada vez que sospeitaba que era controlado polas Forzas e Corpos de Seguridade suspendía a súa actividade. As mesmas fontes policiais relataron que o seu ‘modus operandi’ era “o habitual neste tipo de delitos, a base de contactos de curta duración cos compradores e en lugares diferentes”.
“O que tiña de especial era a cantidade de vehículos utilizados, xa que dispuña dunha frota de ata catro turismos que intercambiaba varias veces durante o día para evitar ser seguido, tamén o facía coas vivendas, onde se detectou a utilización do polo menos tres”, destacou a Policía.
Doutra banda, era habitual que antes dunha entrega “realizase un traxecto sen rumbo ou sentido, con diferentes paradas, en aras a comprobar se estaba a ser vixiado e comprobar en contorna”, puntualiza a Policía Nacional.
Finalmente, os axentes detiveron ao home de 60 anos e procederon á intervención de 300 gramos de cocaína, 450 euros e varios blister con pastillas de tranquimazin, ademais duns gramos de marihuana. De todo iso foi informado o xulgado de garda, a cuxa disposición foi posto o actuado.
