A Policía Nacional de Lugo avisa do intento de estafa telefónica de individuos que se fan pasar por empregados de Microsoft e outras compañías tecnolóxicas para obter datos que poidan chegar a servirlles para estafar ao usuario do teléfono ao que chaman.

Segundo informou a Comisaría de Lugo, a Policía tivo coñecemento de que nos últimos días ·están a recibirse chamadas a teléfonos fixos da cidade, facéndose pasar por empregados do soporte técnico dunha compañía tecnolóxica, Microsoft principalmente”.

As mesmas fontes relataron que, despois de preguntar se se é usuario dun computador, “alegan a existencia dun problema técnico irreal e, tras o emprego de diversas técnicas de persuasión, terminan conseguindo tanto contrasinais como determinada información persoal”.

A Policía sinalou que en determinados casos logran “facerse co control remoto do computador para, posteriormente, extorsionar ao seu propietario, esixíndolle o abono dunha determinada cantidade de diñeiro para poder liberar o control do seu dispositivo”.

Do mesmo xeito, “noutras ocasións conseguen facerse cos datos bancarios do usuario, baleirándolle a conta bancaria en poucos minutos”, subliña a Policía.

Por iso, por parte da Policía Nacional lémbrase que “non se deben facilitar datos de carácter persoal a quen non se coñeza” e, advirte, “moito menos datos bancarios, así como tampouco deben abrirse arquivos adxuntos sospeitosos nin facer ‘clic’ en vínculos inusuais procedentes de correos electrónicos e mensaxes descoñecidas”.