A Policía Local de Lugo denunciou o pasado fin de semana a dous homes por non usar máscara cando transitaban pola vía pública, un deles levábaa colgada no cóbado e o outro, ademais de non levar ningunha encima, faltou ao respecto aos axentes.
Así o informou a Policía Local, que relatou que sobre as 9,45 horas do 31 de xullo unha patrulla da Unidade Territorial de Policía de Barrio observou a un individuo de 32 anos que camiñaba pola Avenida Adolfo Suárez “sen facer uso da máscara obrigatoria”, que a portaba “colgada do cóbado”.
Por iso, foi denunciado por infracción á Lei de Saúde de Galicia, para o que foi trasladado a dependencias policiais para a súa identificación, xa que se atopaba indocumentado.
Ademais, ás 19,45 horas do pasado 1 de agosto, durante un operativo para comprobar o cumprimento das medidas impostas pola COVID-19, unha patrulla da Unidade Territorial de Policía de Barrio de Lugo observou a un home que transitaba pola rúa Bispo Basulto “sen facer uso da máscara obrigatoria”, que tampouco portaba encima, motivo polo que foi denunciado.
Este mesmo individuo foi denunciado por infracción á Lei de Seguridade Cidadá xa que, durante a intervención dos axentes, “proferiu frases e expresións que faltaban ao respecto dos mesmos“, puntualizaron as mesmas fontes.