Efectivos da Garda Civil e do GES de Monterroso (Lugo) buscan neste termo municipal un nonaxenario desaparecido desde a tarde deste martes.
Así o informaron a Europa Press fontes do Instituto Armado e do 112 Galicia, que indicaron que foi un familiar do desaparecido o que avisou ás 10,15 horas deste mércores ao servizo de emerxencias de que faltaba este home.
O alertante indicou que o seu familiar faltaba desde a tarde deste martes no lugar de Marco, na parroquia de Santiago de Ligonde, concretaron por parte do 112 Galicia.
Por iso, o 112 Galicia avisou á Garda Civil, que puxo en marcha un operativo para localizar a este home, así como ao GES de Monterroso. Fontes do operativo concretaron que se rastrexa unha zona de monte neste municipio.
