Desvalixan o piso de dous maiores aproveitando que se mudaran a outra casa durante a pandemia

Cinco persoas foron detidas en relación a este roubo en Lugo. Os arrestados incluso formaron barricadas para impedir o acceso dos axentes de Policía ao interior do inmoble. Entre outros obxectos, levaron un abrigo valorado en 30.000 euros.

Coche de Policía Nacional. ARQUIVO

EFE | A Policía Nacional detivo na cidade de Lugo a cinco persoas como supostos autores dun delito de roubo con forza. Dúas mulleres e tres homes son sospeitosos de asaltar e de desvalixar o piso de dous maiores que se trasladaron do seu domicilio habitual durante o período de confinamento.

Segundo informou a Comisaría Provincial de Lugo, os sospeitosos (con idades comprendidas entre os 18 e os 31 anos) asaltaron a vivenda unifamiliar, situada na rúa Becerreá, e chegaron a formar barricadas para impedir o acceso dos axentes da Policía Nacional ao interior do inmoble.

Os familiares dos propietarios acudían ao seu domicilio cada tres ou catro días para comprobar que “todo estaba ben” e foi o pasado luns —día 20 de xuño— cando recibiron a chamada dun dos veciños para informalos de que había xente descoñecida entrando e saíndo da casa.

Cando chegaron á vivenda, comprobaron que as xanelas do segundo piso estaban abertas e que na primeira planta todo estaba revolto. Entón, tentaron acceder ao interior da casa para recuperar os efectos persoais dos seus propietarios, algúns “de gran valor”, tanto económico como sentimental, pero non puideron entrar porque as portas estaban atascadas con barricadas.

XOIAS, MOBLES, DIÑEIRO E UN ABRIGO DE 30.000 EUROS

Desde o exterior, ademais, puideron ver que gran parte dos obxectos de valor que había na vivenda estaban envolvidos en fardos, feitos con sabas, para ser trasladados.

Tras presentar denuncia na Policía Nacional, axentes da Comisaría de Lugo presentáronse na casa da rúa Becerreá e detiveron as cinco persoas que estaban no seu interior por un suposto delito de roubo con forza.

Os propietarios botaron de menos xoias, mobiliario, diñeiro en efectivo e un abrigo de visón valorado en 30.000 euros. Os detidos foron postos ao dispor da autoridade xudicial.

DEIXAR UN COMENTARIO

Please enter your comment!
Please enter your name here