Intensifícanse os controis de motos en Lugo ao detectar un aumento dos sinistros

Os axentes porán o foco na velocidade de circulación, o uso de casco ou as condicións técnicas do vehículo, entre outras.

Control de velocidade de motocicletas e ciclomotores na provincia de Lugo.. GARDA CIVIL DE LUGO

A Garda Civil de Lugo anunciou que incrementará a vixilancia e os controis sobre os usuarios de motocicletas tras detectar un aumento da sinistralidade deste tipo de vehículos.

Segundo informaron a través dun comunicado, a medida que a provincia “foi recuperando a mobilidade cos sucesivos cambios de fases, foi aumentando a circulación de motocicletas” e, á súa vez, “o número de accidentes nos que se viron involucrados este tipo de vehículos”.

Os axentes incrementarán os controis nas vías e horarios “con maior presenza de motoristas”, en estradas como a N-VI, N-640, N-120, N-634, N-642, LU-530 e LU-633.

Entre todos os parámetros, farase especial fincapé no control de velocidade, as manobras perigosas durante a condución, o uso do casco, a adecuación do permiso de circulación ou as condicións técnicas do vehículo.