A Policía Nacional detivo unha muller onte, en Lugo, por un delito de usurpación do estado civil, ao pretender facer o Documento Nacional de Identidade con datos que pertencían a outra persoa. A muller alegaba a súa urxencia na obtención do DNI para acceder a un suposto contrato de traballo.
Tal muller presentouse hai un par de días nas dependencias de Expedición do Documento Nacional de Identidade, na Avenida de Ramón Ferreiro. Manifestaba que necesitaba facer o DNI, xa que nunca o expedira dende a súa entrada a España. Agora precisábao para un posto de traballo, segundo informan fontes policiais. Os funcionarios informárona de que, debido á actual situación do estado de alarma, só se expiden Documentos “por motivos extraordinarios e previa xustificación”.
Porén, na mañá de onte, a muller acudiu de novo ás oficinas de Ramón Ferreiro e insistiu en que facer o DNI era imprescindible para o contrato de traballo xa citado. Ante tales circunstancias e coa xustificación aportada, procédese a iniciar os trámites da expedición. Entre a documentación precisa para este procedemento, está a Partida de Nacemento, que ela tamén achegou. Non obstante, ao introducir os datos no sistema informático, os funcionarios comprobaron que eses datos correspondían a outra persoa.
Malia que a muller seguiu porfiando en que a Partida era súa, foi detida por un delito de Usurpación do Estado Civil, tal como informan dende a Policía Nacional. De todo isto deuse conta á Autoridade Xudicial, xunto co atestado elaborado ao efecto. A detida foi posta en liberdade á espera do xuízo.