Nova operación antidroga en Lugo: incautan “munición de guerra” e xoias por valor de dous millóns de euros

A intervención enmárcase nun dispositivo estatal que desmantelou unha organización que distribuía droga dende Málaga ata Galicia, Asturias e Madrid.

Material intervido nunha operación antidroga coordinada pola Garda Civil e a Policía Nacional | ALX

EFE | Unha persoa residente en Lugo foi detida e outra imputada como investigada no transcurso dunha intervención estatal contra o tráfico de haxix a grande escala. A operación, desenvolta pola Garda Civil e a Policía Nacional, rematou coa incautación de armas e xoias valoradas en dous millóns de euros.

Fontes policiais informaron a EFE de que nun rexistro domiciliario foron intervidos noventa cargadores de distintas armas de fogo e máis de 15.000 cartuchos de munición prohibida e de guerra.  Os axentes tamén atoparon 17 quilogramos de ouro, 47 quilogramos de prata, 88 pedras preciosas e 70.635 euros en metálico —todo valorado en máis de dous millóns de euros—.

ORGANIZACIÓN ESTATAL

Na operación, organizada a nivel estatal, foron detidas un total de 15 persoas pola súa suposta implicación nos delitos de organización criminal, tráfico de drogas e tenencia ilícita de armas. A organización distribuía droga desde a provincia de Málaga ata Madrid, Galicia e Asturias.

Ademais do material intervido en Lugo, noutros lugares de España incautáronse 458 quilogramos de haxix, 104 de marihuana, 16 gramos de cocaína e 12 de MDMA. Tamén foron intervidas 20 armas de fogo: 14 pistolas, dous revólveres, un fusil de guerra, unha escopeta e dúas carbinas, ademais dun bastón de estoque e un táser.

DEIXAR UN COMENTARIO

Please enter your comment!
Please enter your name here