A Garda Civil interceptou no concello de Lugo un vehículo con cinco persoas no seu interior, que alegaron que ían “dar un paseo polo campo”. Foron denunciadas por incumprir a normativa que limita o número de usuarios e os desprazamentos durante o estado de alarma.
Segundo informou o Instituto Armado, o control tivo lugar á altura do quilómetro 1 da estrada N-540. Alí viron un vehículo con cinco ocupantes, que se escusaron na necesidade de pasear dun dos viaxeiros, de avanzada idade.
A Garda Civil apunta que a maioría da sociedade respecta as restricións de mobilidade, tal como comproban durante o seu “intenso labor de vixilancia”. Aínda así, “en ocasións detéctanse situacións que contraveñen de forma flagrante o establecido para a circulación de persoas”.