A Policía Nacional detivo un home de 36 anos veciño da cidade de Lugo cando realizaba un botellón con outros tres amigos durante o estado de alarma. O home xa fora arrestado en seis ocasións anteriores por saltarse o confinamento, polo que finalmente foi enviado a prisión.
Segundo informou a Policía Nacional, varios axentes viron tres homes que consumían bebidas alcohólicas na entrada dun edificio situado na confluencia da rúa Conde coa Rolda da Muralla. Advertíuselles de que tal conduta era contraria ao establecido na norma do estado de alarma, e máis aínda ao atopárense “sen protección, sen medidas de seguridade e sen manter a distancia requirida para evitar contaxios”.
Dous deles marcharon aos seus domicilios, pero o terceiro resistiuse mentres aseguraba que “seguía de festa e que ninguén lle tiña que dicir o que podía ou non facer”, segundo indicou a Policía.
Ante os antecedentes do home —que xa fora detido en seis ocasións e sancionado tres veces por incumprimentos similares—, os axentes procederon a un novo arresto e ao seu traslado a dependencias policiais. Tras pasar a disposición da autoridade xudicial o sábado xunto con todo o actuado, foi decretado o seu ingreso en prisión.