Un incendio causou danos materiais na mañá deste mércores nunha casa de dúas plantas en San Cristovo de Chamoso, no municipio do Corgo. Afortunadamente, non hai que lamentar danos humanos. Ademais, os servizos de emerxencia lograron rescatar un can que se atopaba no segundo andar.
Os feitos sucederon nunha vivenda situada no punto quilométrico 489 da estrada N-VI. Segundo informou o 112 Galicia, o lume calcinou o mobiliario da cociña e do salón e o fume afectou á casa na súa totalidade.
Foi unha persoa particular quen contactou co 112 Galicia para alertar do incendio, ocorrido sobre as 10:00 horas. Logo diso, pasouse aviso aos Bombeiros de Sarria, a Urxencias Sanitarias de Galicia-061 e á Garda Civil. Finalmente, o lume quedou extinguido a iso das once da mañá.