Arde un camión con palla na A-6 á altura das Nogais

O condutor indicou ao 112 que el mesmo separou a cabeza tractora do remolque do camión e que tratou de extinguir as chamas coa axuda dun extintor.

Bombeiros de Lugo | Concello de Lugo
Bombeiros de Lugo | ARQUIVO

Bombeiros de Sarria interveñen este sábado na autovía A-6, á altura das Nogais, no incendio que se declarou nun camión que transporta palla. Foi necesaria a interrupción do tráfico nun carril da autovía, ao quedar a palla espallada pola vía despois de ser retirada do remolque.

Segundo informou o 112, en concreto o suceso produciuse no lugar de Doncos. Interviñeron tamén voluntarios do GES de Becerreá e axentes da Garda Civil de Tráfico. O 112 tivo coñecemento dos feitos sobre as 13,30 horas pola chamada de varios particulares que alertaron do fume que saía do remolque do camión.

Na extinción participaron tamén voluntarios do GES de Becerreá e axentes da Garda Civil de Tráfico, medios do Concello das Nogais, de Pedrafita e persoal de servizo de mantemento da autovía. O condutor indicou ao 112 que el mesmo separou a cabeza tractora do remolque do camión e que tratou de extinguir as chamas coa axuda dun extintor.

Pola súa banda, os voluntarios do GES de Becerreá retiraron a palla do remolque para tentar conservar a carga o máximo posible. Os medios dos concellos acudiron con distintos materiais para atallar as chamas. A esta hora, os servizos de emerxencia alí desprazados continúan traballando e tratan de esclarecer as causas que orixinaron o lume.