Un incendio calcina a vivenda de dous anciáns en Friol

Os labores de extinción prolongáronse durante toda a noite.

Parque de bombeiros de Vilalba | Bombeiros da Terra Chá

Dous octoxenarios foron trasladados ao Hospital Universitario Lucus Augusti (HULA) de Lugo por intoxicación por fume debido a un incendio que esta madrugada calcinou a súa vivenda practicamente na súa totalidade.

Segundo informan fontes do 061-Urxencias Sanitarias, as vítimas son un home de 87 anos e unha muller de 80. O domicilio estaba situado en Cima de Vila, na parroquia de Narla.

Tal e como indica o Centro Integrado de Atención ás Emerxencias (CIAE) 112, foi un particular quen deu o aviso ao fío das 1,30 horas da madrugada do luns.

Seguidamente, os xestores do servizo de emerxencias informaron ao 061-Urxencias Sanitarias, aos bombeiros de Vilalba e á Garda Civil. Os labores de extinción finalizaron ao redor das 8,00 da mañá.