A Policía Local de Lugo identificou ao presunto organizador dunha “quedada” de vehículos, cuns 130 asistentes, non autorizada, nas que foron denunciados unha decena por carecer de seguro obrigatorio de automóbiles e tres condutores por conducir de maneira neglixente.

Así o informou a Policía Local de Lugo, que relatou que, ao ter coñecemento a través das redes sociais da convocatoria dunha “quedada” de vehículos denominada “a noite das bestas” no aparcadoiro do Pazo Universitario ás 23,30 horas do venres pasado, estableceu un operativo especial con vehículos policiais rotulados e camuflados.

Deste xeito, o operativo, para “garantir a tranquilidade e seguridade de todos os cidadáns” ante a denominada “a maior quedada do ano”, estivo a cargo da Unidade Territorial de Policía de Barrio.

Os axentes comprobaron que se reuniron na chaira do Pazo Universitario uns 130 vehículos, entre os que se formularon unha decena de denuncias por carecer de seguro obrigatorio para automóbiles, ITV caducada ou por levar arestas ou adornos que sobresaían máis do permitido.

Así mesmo, apuntaron as mesmas fontes, no polígono industrial das Gándaras reuníronse uns 25 vehículos e os axentes sorprenderon a tres condutores que conducían dunha maneira “neglixente”, motivo polo que foron identificados e denunciados.

Tamén os axentes identificaron ao que “probablemente pode ser o organizador do evento no Pazo Universitario” e comprobaron que sobre o seu vehículo “pesaba unha orde de procura, captura e precinto” por unha requisitoria da Seguridade Social, polo que foi levado ao depósito municipal, onde quedou precintado.

A esta persoa, destacou a Policía Local, o resto de asistentes á “quedada” reservábanlle ao seu vehículo “un lugar preferente no centro”. Por outra banda, os axentes tramitaron acta de suposta infracción á Lei de Espectáculos Públicos e Actividades Recreativas de Galicia, xa que “se dan todos os requisitos que esixe a citada norma, necesidade de título habilitante para a celebración deste evento, pois consiste na exhibición de gran concorrencia de vehículos convocados de carácter deportivo, na que se reuniron polo menos 130 turismos de características similares”.

VÍDEO

No marco deste operativo un cidadán, cando circulaba como ocupante dun vehículo pola estrada N-V, observou a “condución temeraria dun turismo”, polo que o gravou e puxo o vídeo a disposición da Policía Local de Lugo.

Axentes localizaron máis tarde o vehículo en cuestión estacionado nunha rúa da cidade de Lugo. Ao ser unha vía con competencia da Garda Civil de Tráfico, a Policía Local puxo os feitos no seu coñecemento.

Pola colaboración cidadá a Policía Local de Lugo expresou o seu “agradecemento á persoa que gravou o vídeo” pois “é o documento polo cal se poderá investigar a ese condutor por un delito contra a seguridade viaria”.