Tres persoas foron arrestadas despois de ser descubertas cando viaxaban con 9 quilos de marihuana no maleteiro dun taxi pola cidade de Lugo en dirección a Bilbao. O arresto produciuse o pasado xoves e foi levado a cabo por axentes da Garda Civil, que dá por “practicamente” pechada a investigación.

Os detidos foron sorprendidos por unha patrulla da Benemérita na ligazón da Avenida de Madrid coa A-8 cando, supostamente, se dirixían a Bilbao, cidade da que proceden dous dos arrestados.

Unha vez interceptados, os axentes de Tráfico captaron certo nerviosismo nos tres homes, á vez que percibiron un forte cheiro a marihuana que procedía do interior do coche, polo que procederon a revisar o maleteiro do taxi.

Segundo fontes da investigación, os tres detidos atópanse nos calabozos da comandancia de Lugo. Un deles fora detido hai un mes “con máis dun quilo de marihuana”, apuntan fontes da investigación.

Os tres arrestados contan con “numerosos antecedentes”, sinalan estas fontes, que aseguran que un dos detidos “negábase a saír” da cela no cuartel de Lugo e reclamaba “ir directamente a prisión”.