O presidente da Asociación Provincial de Empresarios de Hostalaría de Lugo, Cheché Real, expresou a súa confianza de en que “en dez días” se amplíe o horario de bares e cafetarías ata as 23,00 horas en toda Galicia, como se fixo xa cos restaurantes a partir deste venres.
Ante esta flexibilización de horarios, Real recoñeceu que están “moi satisfeitos” no sector, aínda que deslizou que “falta un pouco máis”: “Igualar dito horario das once da noite a todos os establecementos de hostalaría”.
Outro aspecto que valorou é o que se decidiu con respecto ao lecer nocturno. Neste contexto, avanzou que “no mes de xuño” tentarase que este sector “poida abrir coas peculiaridades que esixen estes tempos”. “Non vai abrir ata as 4,00 ou as 5,00 da mañá, pero esperamos que se poida abrir a partir de mediados de xuño coas restricións que se determinen”, indicou.
Así, Real adiantou que “en posteriores reunións avaliaranse que medidas levarán a cabo para facer esta apertura”, que dependerá da experiencia “piloto” que se porá en marcha a partir de “mediados de maio” nalgúns locais de Galicia de lecer nocturno.
O que si que se “puxo encima da mesa é que é imprescindible para este subsector da hostalaría o uso da música, porque isto é o que lles diferencia. Se non teñen música é coma se se pode abrir unha piscina pero non pode ter auga”, concluíu o presidente da Asociación Provincial de Empresarios de Hostalaría de Lugo, Cheché Real.