Positivo en covid o alcalde de Palas de Rei, cunha das incidencia de casos máis alta de Galicia

A incidencia acumulada a 14 días en Palas de Rei é de 2.285 positivos por 100.000 habitantes.

O alcalde Pablo Taboada Camoira | Concello de Palas de Rei
O alcalde Pablo Taboada Camoira | Concello de Palas de Rei

O alcalde de Palas de Rei, o popular Pablo Taboada, deu positivo en covid-19 nunha proba PCR realizada o venres, segundo comunicou o propio Concello. A través da súa páxina web, o Consistorio explicou que Taboada xa se atopaba confinado por manter contacto cun caso de coronavirus no “ámbito familiar”, aínda que dera negativo na primeira proba. Agora, ao dar positivo nunha segunda, seguirá en illamento.

O positivo do alcalde coincide co progresivo avance da terceira onda neste municipio lucense, onde nos últimos 14 días detectáronse 76 casos de covid, segundo os datos do Servizo Galego de Saúde (Sergas) actualizados a este sábado.

Isto implica que, ao ter unha poboación de 3.326 –de acordo con cifras do Instituto Galego de Estatística (IGE)–, a incidencia acumulada a 14 días en Palas de Rei é de 2.285 positivos por 100.000 habitantes, das máis altas de Galicia.

Por iso, o Concello roga aos seus veciños un “cumprimento estrito” das normas sanitarias establecidas pola Xunta e unha “máxima precaución” para extremar as medidas hixiénico sanitarias.