A área sanitaria de Lugo vai achegándose cada vez máis aos 2.000 casos activos de coronavirus, se ben o ritmo é agora máis lento. Neste xoves 28 de xaneiro, o Sergas refire 1.978 positivos activos (24 máis ca onte). Nas últimas 24 horas, as probas PCR confirmaron 130 casos novos, unha cifra bastante menor á de onte, cando se rexistrou un pico con 184 contaxios detectados.
Nos hospitais a situación parece manterse estable con 72 ingresos (só un menos). 57 deles están en planta e 15 nas Unidades de Coidados Intensivos. Destes últimos, están todos no HULA agás un paciente que está a ser atendido na UCI de Burela. Ademais, o Hospital Universitario Lucus Augusti atende 33 pacientes en unidades de hospitalización (+4); o da Mariña, 13 (-4); o de Monforte, 10 (-1); e o Polusa, 1 (=).
Nas últimas 24 horas realizáronse 1.518 probas PCR, do total de 154.202 que se efectuaron dende o inicio da pandemia. Os datos históricos tamén revelan que se curaron 7.665 persoas e que, ata o momento, faleceron 163 persoas que foran diagnosticadas con Covid-19.
GALICIA
No conxunto galego, case se alcanzan os 200 pacientes na UCI tras o máximo acadado onte. Os contaxios baixaron, pero mantéñense nos 1.468. Podes ler máis información no Galicia Confidencial.