A situación epidemiolóxica da provincia de Lugo é cada vez máis preocupante, tal como advertía onte o xerente da área sanitaria, Ramón Ares. Nas últimas 24 horas detectáronse 151 casos de coronavirus a través de PCR, se ben o número de probas efectuadas foi máis alto ca de costume. Os positivos activos sitúanse xa nos 1.449 (88 máis ca onte).
Segundo datos do Sergas, os hospitais da provincia teñen un menor cómputo total de pacientes, pero aumenta a presión nas UCI. Así, das 46 persoas ingresadas, o HULA ten 18 en planta e dez na UCI; o da Mariña, 16; e o de Monforte, dúas.
No día de onte, o Sergas comunicou 18 vítimas mortais da pandemia, pero ningunha delas na provincia, polo que se seguen contabilizando 158 falecementos en Lugo. Do mesmo xeito, os datos históricos tamén revelan que se curaron 7.526 persoas dende o inicio da pandemia e que se realizaron 145.979 probas PCR (1.816 onte, unha cifra bastante máis elevada ca a habitual).
Estas cifras virán acompañadas, seguramente, dun endurecemento das restricións nalgúns concellos, tal como avanzou onte o presidente da Xunta de Galicia, Alberto Núñez Feijóo. O xerente da área sanitaria lucense, Ramón Ares, pedía onte aos veciños da provincia que se autoconfinaran e evitaran ao máximo as relacións sociais.
DE RÉCORD EN RÉCORD
A situación é aínda peor no conxunto da comunidade galega, que volve superar o máximo de contaxios con 1.082 casos confirmados nas últimas 24 horas. Con todo, o máis desfavorable é a traslación destes datos aos hospitais, que volven ver incrementada a presión asistencial con outros 53 ingresos. Hai 795 pacientes en planta e 137 en unidades de críticos.
