A presidenta do Banco de alimentos de Lugo, Amadora Núñez, calcula que se repartiron “preto de cen toneladas” de comida durante as festas de Nadal a través das tres sedes coas que conta a entidade na provincia (Lugo, Monforte e Foz).
Amadora Núñez puntualizou que estes días dispuxeron de “tenreira, pito, capóns, tamén patacas, leite, arroz, macarrones, batidos e zumes”. “Tivemos de todo”, destaca. Tamén se empezou a ter en conta a zona de Sarria, “que está moi necesitada” e a onde se enviaron dous tráilers.
A cobertura chegou a unhas “dúas mil familias”, tal como estima. O groso das mesmas está na cidade de Lugo, con máis dun milleiro. Núñez chama a atención sobre a axuda que requiren estas persoas que non chegan a fin de mes.
“Unha mamá soa, un papá só traballando só cos salarios que perciben non lles chega para soster á familia. Son salarios de 700 ou 800 euros, mesmo de 600. Ou xente a media xornada que logo traballan xornada completa e non lles chega. Teñen que facer fronte aos recibos, roupa, comida… Aí ou traballan os dous ou, se non, non chega”, explicou.