O home acusado de abusar e maltratar os seus fillos nega os feitos durante o xuízo

A Fiscalía pide para el nove anos e nove meses de prisión.

Audiencia Provincial de Lugo | Google
Audiencia Provincial de Lugo | Google

EFE |  O home que desde este martes está a ser xulgado na Audiencia Provincial de Lugo por abusar supostamente dos seus dous fillos menores e de maltratar a un deles, negou hoxe na vista oral os feitos que lle imputa o ministerio fiscal e asegurou que sempre tivo unha boa relación cos nenos.

No transcurso do xuízo, o acusado negou calquera tipo de agresión sexual ou física aos seus fillos, con quen dixo levarse ben. De feito, asegurou que non lles pegaba e que só os castigaba na súa habitación cando non ían ben cos seus estudos.

O ministerio fiscal pide nove anos e nove meses de prisión para este veciño da zona sur da provincia de Lugo. Segundo o escrito de acusación, o suposto abuso sexual produciuse no primeiro semestre de 2018, cando ambos menores se atopaban pasando unha fin de semana na casa do seu pai, despois do divorcio da nai dos seus fillos, que se produciu o 5 de decembro de 2017.

O ministerio fiscal sostén que o acusado lles realizou tocamentos a ambos cando durmían na súa mesma cama, “aproveitando a relación de parentesco e inspirado por un ánimo libidinoso”. Ademais, considera probado que, antes da disolución do matrimonio, o acusado agrediu violentamente ao seu fillo menor no domicilio familiar, ao que lle propinou numerosas “patadas e labazadas, agarrouno polo pescozo e lanzouno violentamente” contra a parede ou contra o chan.

PETICIÓN DE PENA

O fiscal considera que eses feitos son constitutivos de dous delitos contra a liberdade sexual de abuso a menor de dezaseis anos, na súa modalidade agravada, por valerse o acusado da súa relación de parentesco, e dun delito de malos tratos físicos habituais no ámbito da violencia doméstica, tamén agravada por producirse no domicilio familiar.

Polo delito de abuso sexual á súa filla, o ministerio fiscal pide catro anos e un día de prisión, a mesma pena que solicita por abusar sexualmente do seu fillo, mentres que polo delito de malos tratos físicos solicita 21 meses e un día de cárcere.

Tamén pide que se lle prohiba achegarse ao seu fillo durante oito anos e á súa filla durante cinco, ademais de solicitar que, unha vez cumprida a pena de cárcere, se lle impoñan dez anos de liberdade vixiada. Ademais, en concepto de responsabilidade civil, o acusado deberá indemnizar a cada un dos seus fillos con 2.000 euros por danos morais.

DEIXAR UN COMENTARIO

Please enter your comment!
Please enter your name here