O número de casos activos de coronavirus en Galicia subiu en dous, ata 310, mentres que as persoas curadas tamén aumentaron, en 5, e sitúanse en 10.611. Este aumento, débese, especialmente, polo incremento de casos na área sanitaria de Lugo polos brotes da Mariña, que sumaron cinco casos máis este domingo.
Dos 310 casos positivos, 132 corresponden á área de Vigo –un máis que o sábado–; 72 á da Coruña e Cee –tres menos–; 25 á de Santiago e Barbanza –un menos–; 22 á de Ourense –os mesmos–; 39 á de Lugo –cinco máis–; 11 á de Ferrol –igual– e nove á de Pontevedra –uno máis–.
Sanidade sinala que, ata a data, curáronse en Galicia 10.611 persoas, mentres que os falecidos con COVID mantéñense en 619. A última vítima, notificada o pasado 10 de xuño, foi un home de 83 anos que estaba ingresado no Complexo Hospitalario Universitario de Vigo. Do total, 274 estaban vinculadas con residencias de maiores.
O número de PCR realizadas ascende a 176.539, fronte ás 171.518 contabilizadas ata este sábado.
BROTES
En canto aos dous brotes localizados en Galicia na última semana, un na comarca do Barbanza (A Coruña) e outro na Mariña (Lugo), fontes da Consellería de Sanidade ratificaron que continúan sen cambios.
Na Mariña, este sábado aumentaron os positivos por coronavirus ata 22, tras máis de 200 probas PCR realizadas na zona. O primeiro caso detectouse o pasado martes pola tarde no municipio de Xove e, con esta confirmación inicial, comezou o traballo de rastrexo e análise dos contactos das persoas afectadas.
Así mesmo, o foco de COVID-19 detectado a pasada fin de semana na comarca coruñesa do Barbanza, concretamente en Ribeira e A Pobra, mantense con nove positivos.