Unha Festa da Xuventude en pantuflas e pixama…, pero co DJ Marcos Peón

O vindeiro 16 de maio, a partir das 22:00 horas, a páxina de Facebook do Concello de Lugo emitirá música en directo para que a mocidade "manteña o optimismo" durante o confinamento.

Actuación de Dj Frisco & Marcos Peón | ALX

Se o obxectivo é facer festa, pouco importa cales sexan as circunstancias. Mesmo que sexa na casa. De feito, así é como vai ser a Festa da Xuventude do vindeiro 16 de maio, organizada polo Concello de Lugo: en pantuflas e bailando ao son do que pinche DJ Marcos Peón do outro lado da pantalla.

“Temos que manter o optimismo e a unidade nesta complicada situación“, resaltou a edil de Xuventude, Ana G. Abelleira, que anima as mozas e mozos a unirse a este evento virtual que se emitirá ás 22.00 horas do sábado 16 a través da páxina de Facebook do Concello.

O DJ Marcos Peón, xa un esencial da festa luguesa e con proxección internacional, será quen poña a música en directo. Máis de vinte anos de experiencia en cabinas avalan a súa carreira, durante a que viaxou por gran parte da xeografía española coas súas enérxicas sesións.

Esta iniciativa súmase a outras tamén dirixidas á mocidade, como o certame de curtametraxes en confinamento ou un concurso de monólogos.

DEIXAR UN COMENTARIO

Please enter your comment!
Please enter your name here