Cinco usuarios do centro pechado en Burón poderán pasar á residencia pública da Fonsagrada

Estes maiores, naturais do concello fonsagradino, xa teñen praza reservada no Residencial Rois e o seu traslado só está á espera da finalización dos trámites burocráticos.

A residencia da Fonsagrada / Deputación de Lugo

EFE | Cinco maiores fonsagradinos que residían nas vivendas comunitarias Burón I e Burón II, pechadas cautelarmente pola Xunta, poderán seguir vivindo no concello da Fonsagrada ao teren praza reservada na residencia pública da localidade.

O alcalde da Fonsagrada, Carlos López, confirmou que o Concello xa enviou un escrito á Consellería de Política Social para solicitar formalmente a “derivación” destas cinco persoas ao Residencial Rois, de titularidade provincial e aberto o pasado mes de febreiro.

De momento, explicou, o goberno local segue “á espera” de que se realice ese trámite, pero confía en que quede liquidado nos próximos días, porque por parte da Xunta de Galicia a resposta foi afirmativa. Unha vez realizados todos os pasos burocráticos, os ancíans poderían “ingresar de forma inmediata na residencia pública, porque xa teñen a praza reservada”.

O RESTO, NO CARBALLIÑO

Pola súa banda, a Consellería de Política Social, tras ordenar o peche cautelar das vivendas comunitarias e de dar traslado á Fiscalía e á Garda Civil das irregularidades advertidas polos seus inspectores nese centro, ofertoulles aos familiares dos usuarios o traslado á residencia pública do Carballiño, en Ourense.

DEIXAR UN COMENTARIO

Please enter your comment!
Please enter your name here