Outros dous falecidos por coronavirus no HULA e 456 positivos confirmados na provincia

A morte de dous homes de 71 e 91 anos fai un total de nove finados pola Covid-19 na provincia. En Galicia supéranse os 4.000 casos activos, con 115 falecementos e 259 altas. O Sergas indica que a taxa de letalidade na nosa comunidade é a máis baixa de España.

Hospital Universitario Lucus Augusti (HULA) | Grupo San José
Hospital Universitario Lucus Augusti (HULA) | Grupo San José

A Consellería de Sanidade confirmou o falecemento por coronavirus de dous varóns, de 71 e 91 anos, ingresados no HULA. Desta maneira, a provincia xa contabiliza nove mortes pola Covid-19, mentres que o número de infectados ascende aos 456, segundo a última actualización do Sergas.

Esta cifra supón 87 casos activos máis ca os rexistrados onte, 31 de marzo. Deles, trece permanecen na UCI, 78 en hospitalización e 367 nos seus domicilios, sendo estes últimos os que máis se incrementaron nas últimas 24 horas (+76).

Dende onte, déronse catro altas máis a pacientes infectados por coronavirus na provincia, de forma que xa suman un total de 17 altas na área sanitaria de Lugo. 

RESTO DE GALICIA

No referido ao conxunto galego, Sanidade informa de 4.058 casos activos, dos que 906 pertencen á área da Coruña; 559 á de Ourense; 382 á de Pontevedra; 955 á de Vigo; 581 á de Santiago; e 219 á de Ferrol. O número de falecementos ascende a 115 e as altas confirmadas soben ata as 259. 

Ademais, os datos do Sergas indican que Galicia presenta a taxa de letalidade máis baixa de todas as comunidades autónomas de España. Isto fai referencia á porcentaxe de falecementos respecto do total de contaxiados, sendo en Galicia dun 2’32% fronte ao 8’86% da media estatal. Tan só as cidades autónomas de Ceuta e Melilla teñen unha taxa inferior.

DEIXAR UN COMENTARIO

Please enter your comment!
Please enter your name here