O alcalde de Friol, José Ángel Santos, sumouse as tarefas de desinfección das rúas municipais coa axuda do seu tractor particular. Ao ver que o persoal de mantemento non daba abasto cos medios propios do Concello, Santos fixo uso da maquinaria da súa explotación agrícola para unirse a estes traballos de limpeza.
Como medida de prevención fronte ao coronavirus, o Concello de Friol decidiu desinfectar todas as rúas da capital municipal, así como os accesos e vías do polígono industrial. “A responsabilidade forma parte do noso cometido”, dixo o alcalde a EFE. Por iso, el botou man dun dos seus tractores e unha sulfatadora agrícola de 1.200 litros de capacidade, na que mesturaron os produtos desinfectantes con auga.
“Estamos nunha situación extraordinaria e hai que facer actuacións extraordinarias”, precisou José Ángel Santos, quen explicou que utilizou os medios da súa explotación para “botarlle unha man ao persoal de mantemento” municipal, porque “facer todo ese traballo unicamente con medios humanos era inviable”, concluíu.
