O xulgado arquiva a causa contra a comunidade de montes que preside o alcalde de Xermade

Un comuneiro denunciara irregularidades nas contas da entidade, pero o xulgado non ve tal. O rexedor socialista, Roberto García, achaca a denuncia a "cuestións persoasi

O alcalde de Xermade, Roberto García | ALX

O xulgado de primeira instancia e de instrución número 1 de Vilalba decretou o sobresemento provisional contra a Xunta Reitora da Comunidade de Montes Veciñais en Man Común da parroquia de Lousada (Xermade). Esta entidade está presidida polo alcalde da localidade, o socialista Roberto García, polo que o fallo que tamén supón o arquivo do proceso contra o rexedor.

A denuncia partía dun comuneiro, que sinalaba irregularidades nas contas da comunidade de montes, cun desfasamento de máis de 30.000 euros no balance contable do ano 2017. O xulgado rexeita esta posibilidade, posto que “a suma de ditos saldos (da comunidade de montes) é mesmo superior ao superávit que consta no indicado balance”.

“ACOSO” E CUESTIÓNS PERSOAIS

O alcalde de Xermade, Roberto García, lembrou que “desde o primeiro momento” dixera que era “inocente” e que “non defraudara nin se apropiara indebidamente de nada”, nin el nin a xunta directiva. “Eu sempre facilitei información nas reunións que tiñamos”, insistiu, en referencia á súa transparencia.

García segue presidindo dita comunidade e asegurou que todo “estaba e segue perfecto” no seo desta organización. Achaca a denuncia a unha cuestión persoal. “Eu notaba que era acoso contra min. Este mesmo señor [o denunciante] presentou noutra ocasión unha denuncia contra a miña familia que tamén era falsa e que, polo tanto, foi arquivada posteriormente”, lamentou. O alcalde de Xermade non descarta presentar unha querela contra o denunciante.