Seguen recomendando non consumir auga da traída no Concello de Guitiriz

Hai un par de semanas detectáronse altos niveis de ferro.

Auga da billa / Pixabay.

O Concello de Guitiriz mantén esta semana a recomendación de non consumir auga da traída, polo menos ata este venres, tras detectar hai un par de semanas as análises periódicas municipais “un alto nivel de ferro”.

Segundo informaron fontes municipais, o Concello esperará aos resultados das analíticas que está previsto realizar este xoves e que prevén coñecer o venres.

As mesmas fontes explicaron que o nivel de ferro na auga “segue baixando” segundo as analíticas “internas” realizadas polo técnico municipal de Medio Ambiente, pero aínda se manteñen por encima do normal.

Ademais, a empresa responsable da auga instalou uns filtros para controlar o nivel de ferro e está previsto que este mércores regrese a ver “como funcionan os axustes” realizados.

Con todo, o Consistorio mantén a recomendación de non consumir a auga da traída, que se mantén desde o venres 11 cando informou de que na última analítica da auga recibida polo laboratorio contratado polo Concello de Guitiriz “se detectou un alto nivel de ferro polo que o goberno local recomenda aos veciños non consumir a auga da traída ata que a situación se solvente”.

CONTROIS FRECUENTES

“Debido aos recorrentes problemas que sofre a auga en Guitiriz, o Concello realiza un control exhaustivo da auga para coñecer periodicamente o seu estado”, explicaron fontes municipais, que engadiron que “grazas a este seguimento continuo púidose detectar esta incidencia ao instante”.

O resto de parámetros “son totalmente correctos”, subliñou o Concello, polo que “a auga está cualificada como potable”, pero advertiu de que “unha continua inxesta de ferro pode chegar a provocar problemas de saúde, por iso é polo que se desaconsella o consumo ata que os niveis de ferro volvan á normalidade”.