O novo goberno local de Lugo ten coma un dos seus principais obxectivos chegar aos 100.000 habitantes. Un reto que non só é númerico, senón que lle reportaría importantes incentivos económicos á cidade. Por iso, entre as iniciativas deseñadas polo concello destaca a decisión de levar esa campaña para animar aos residentes que aínda non están empadroados a inscribirse oficialmente aos grandes concertos do programa oficial das patronais de San Froilán.
De feito, antes do inicio dos concertos, nas dúas grandes pantallas situadas a ambos os dous lados do escenario, as que se utilizan para proxectar as imaxes das actuacións, pásase a mensaxe “Contigo 100MIL. Empadróate”.
Este xoves xa se proxectou esa mensaxe antes do concerto que ofreceron Javier Gurruchaga e outros mitos de música pop-rock dos anos 80, e este venres volverá suceder antes doutro dos concertos multitudinarios do San Froilán, o que ofrecerá a partir das 22:00 horas o cantante Don Patricio na Praza Horta do Seminario.
O tenente de alcalde, Rubén Arroxo, acompañado polos demais membros nacionalistas do goberno bipartito anunciou hai algunhas semanas a posta en marcha desta campaña para incentivar o empadroamento, co obxectivo de chegar aos 100.000 habitantes, unha cifra que lle permitiría á cidade acceder a maiores ingresos por parte do Estado.
En declaracións aos medios de comunicación, Rubén Arroxo, lembrou que actualmente “Lugo está no seu máximo histórico de poboación”, dado que se atopa a “só 600 persoas de chegar aos 100.000 habitantes”.
Nesa campaña implicáronse as áreas de Cultura, dado que desde a Concellería de Educación traballarase a través das escolas infantís e gardarías; Participación, que buscará a implicación dos usuarios do mercado municipal; e Mobilidade, que se encargará de informar os usuarios do transporte público municipal.
“Superar a barreira dos 100.000 habitantes implicaría un maior investimento do Estado e da Xunta de Galicia, ademais de aumentar o atractivo para captar certos eventos que xeran un importante retorno económico”, dixo o tenente de alcalde