Facua denuncia que a aseguradora BanSabadell seguiulle cobrando a un veciño de Lugo durante ano e medio un seguro de vida vinculado a un préstamo para comprar un vehículo que xa estaba amortizado. Finalmente, a compañía terminou devolvéndolle os 251 euros que pagara a maiores.
O afectado, tal e como relata a organización de consumidores, contratara unha póliza que lle cubriría durante os cinco anos que lle levaría o pago do coche. Entre as condicións do seguro de vida, asegura Facua, estaba a posibilidade de cancelación en caso de amortizar de forma anticipada a totalidade do préstamo.
Conforme a isto, o denunciante decidiu abonar a totalidade do préstamo do coche ao ano seguinte de compralo e solicitou por escrito a cancelación da póliza. No entanto, “non obtivo resposta” por parte da compañía de seguros e continuou cobrándolle a prima da póliza, asegura Facua.
Tras a reclamación por parte da asociación de consumidores, segundo informa, a aseguradora procedeu en novembro de 2018 á cancelación da póliza e reintegrou a cantidade de 251,45 euros que o denunciante pagara a maiores.