A Xunta de Galicia reclamará ao Ministerio de Xustiza que, “de forma inmediata”, “rectifique” a proposta de creación de novos xulgados para Galicia en 2019 incluíndo un novo Xulgado do Social para a cidade de Lugo.
Así se desprende tras o debate deste martes no pleno do Parlamento galego, onde o Partido Popular presentou unha proposición non de lei para solicitar o xulgado.
Neste sentido, a deputada do PP Paula Prado lamentou a decisión “unilateral” do Executivo central de non crear este xulgado “en contra do criterio de todos os axentes implicados”.
Para a deputada nacionalista Olalla Rodil, é “inadmisible” que Lugo quede sen Xulgado do Social, polo que tachou de “parche” os anuncios de novos postos nos tribunais lucenses realizados polo Goberno de Pedro Sánchez.
Neste sentido, subliñou que o BNG apoiará este mércores a iniciativa do PP, aínda que sinalou que hai que “ir máis aló”, xa que “Lugo tamén necesita un xulgado específico de Violencia Machista”.
Tamén o PSdeG mostrou a súa predisposición a votar a favor da proposición non de lei xa que, segundo a deputada socialista Patricia Vilán, “non é a primeira vez” que se debate no Parlamento porque “xa foi pedida polo PSOE hai anos”.
“Xa foi aprobada na comisión mixta en 2017 por unanimidade”, destacou Vilán, quen reprochou ao PP que cando o presidente do Goberno era Mariano Rajoy non solicitaban “nada de nada”.
Na mesma liña referiuse o representante de En Marea Luís Villares, quen ironizou con que antes da moción de censura de Rajoy “xa había peticións” doutros grupos. Ambos os discursos foron criticados, á súa vez, por Paula Prado.
