O presidente da Deputación de Lugo, o socialista José Tomé, ironizou este venres coa protesta dos alcaldes do PP deste xoves ante o Pazo Provincial, unha “performance” do que deu en chamar “Partido Popular Podemita”.
Tomé referiuse así á concentración que protagonizaron onte os 32 alcaldes populares contra o estado de “abandono” dalgunhas estradas provinciais. “Ao ver que estaban agachados, dando cos cascos no chan pareceume o ensaio dunha batucada preparando o espectáculo para as actuacións de verán”, chanceou, para considerar que sería un “grupo perfecto para presentarse a Got Talent’. “Mesmo eu lles podería aplaudir”, engadiu.
“Moi mal ten que estar o PP na provincia de Lugo con este tipo de espectáculo rueiro para chamar a atención, que é máis propio de partidos que eles chaman podemitas e fan aquí en Lugo o que critican logo en Madrid”, sinalou.
Tomé acusounos de “botar de menos tempos pasados en que gobernaban na sombra, sen mancharse, e utilizaban a institución en beneficio propio”. Considerou “evidente” que o PP “non ten argumentos para facer oposición a este humilde presidente”.
Neste sentido, instou aos populares a asumir que o Goberno actual foi capaz de “normalizar o funcionamento da Deputación como unha institución seria”.
“Por min poden seguir instalados na política da fochanca. Mentres eu sexa presidente eses tempos que bota de menos o PP non van volver á Deputación. Para min o PP a partir de agora pasa a ser o partido do tres P’s, o Partido Popular Podemita ou polemizado“, sentenciou.
CRÍTICAS DIRECTAS A CASTIÑEIRA
Tras isto, reprochou ao portavoz provincial, Javier Castiñeira, que “desde que o botaron da alcaldía os veciños de Foz non atopa o seu sitio” e dedícase a “imitar” á presidenta do PP lucense, Elena Candia, pero “sen propostas para facer o papel de oposición”.
“Xa ten mérito ver a Castiñeira facendo de piquete, coma se o Partido Popular de Lugo fose unha empresa que está en crise e que parece que si. Con respecto a Candia, coa súa vestimenta e o seu aspecto de leopardo que tiña onte, sinceramente daba a imaxe do vaqueiro americano que entrou no Capitolio en Estados Unidos”, criticou.
Tomei considerou “sorprendente” que falen “de trato discriminatorio”, cando Candia “en pouco máis de 3 meses que foi presidenta desta institución” asinou 43 convenios dos que 42 tratáronse de convenios para “concellos do PP”.
ACORDOS
Por outra banda, na xunta de goberno, o presidente anunciou a aprobación do programa ‘Saborea a túa provincia’, unha das dez medidas recollidas no Plan de Impulso da Economía “para o apoio e promoción do consumo dos sectores económicos máis afectados as restricións sanitarias, sobre todo hostalaría, turismo e comercio local”.
Este programa conta cun orzamento de 100.000 euros destinados a “incentivar o consumo de produtos da provincia”. “Organizaranse xornadas gastronómicas, tamén lúdicas por toda a provincia cada fin de semana nas que diferentes cociñeiros e cociñeiras lucenses colaborarán cos establecementos locais para facer pratos con produtos típicos de cada zona e haberá actividades para todos os públicos”, relatou.
Sempre que as condicións sanitarias o permitan, este programa “desenvolverase no mes de agosto, en nove xornadas gastronómicas e lúdicas, alternando zonas da costa con zonas do interior”, detallaba finalmente o presidente provincial de Lugo.
