Polo menos 220 deficiencias foron detectadas no novo auditorio de Lugo, desperfectos que será necesario arranxar antes da súa apertura, segundo advertiu este mércores a alcaldesa da cidade, Lara Méndez, na presentación dos resultados dun estudo encargado polo Concello.
A rexedora sinalou que o informe encargado conclúe que as instalacións presentan “deficiencias de consideración nos sistemas de protección contra incendios”, así como na instalación de subministración “de gas, na ventilación e na climatización”.
Para emendar esas deficiencias, entre as que se inclúen “múltiples filtracións, que afectan mesmo aos acabados do inmoble”, o Concello de Lugo terá que investir 430.000 euros, apuntou a rexedora.
Segundo o estudo, a deterioración do edificio é “froito de erros construtivos”, pero “fundamentalmente da súa falta de mantemento durante o tempo que o inmoble estivo desocupado ata a súa recepción” por parte do Concello, indicou.
Ao caducar a garantía das obras, o Goberno local sacará a licitación o arranxo das instalacións co obxectivo que o auditorio poida abrir as súas portas despois do verán. Con ese novo gasto, o Goberno local calcula que o Concello de Lugo abonará o 21 % do custo desta infraestrutura cultural.