EFE | O vicepresidente da Junta de Castilla y León, Francisco Igea (Cs), rexeitou este xoves os “soños imperiais” e “fantasías” do Bloque Nacionalista Galego (BNG), acerca da posibilidade de que a comarca leonesa do Bierzo sexa unha provincia e que posteriormente se integre en Galicia.
Na rolda de prensa posterior ao Consello de Goberno, preguntado por esta cuestión xurdida logo de que o BNG presentara no Parlamento Galego unha proposición non de lei neste sentido, Igea dixo que “non procede maior comentario”, pero vinculou esta demanda cos “afáns imperiais” desa formación nacionalista.
Neste sentido, considerou “típico dos partidos nacionalistas” este tipo de reivindicacións, ante as que a Junta de Castilla y León se vai ater á lei e á Constitución, en lugar de responder a estas “fantasías nacionais e imperiais”, que non dan resposta aos problemas dos cidadáns noutros ámbitos como a sanidade, o emprego e os plans territoriais.