InicioPolíticaA Deputación ofrece "botar unha man" á Xunta para o novo modelo...

A Deputación ofrece “botar unha man” á Xunta para o novo modelo de residencias: “somos un bo espello”

O presidente da Deputación de Lugo, José Tomé, declarou que o modelo provincial é "un modelo centrado nas persoas" e "non no negocio", cunha "media de 30 usuarios por centro" e un cociente que "supón case un traballador" por interno.

PUBLICADA O

- Advertisement -

O presidente da Deputación de Lugo, José Tomé, ofreceuse este xoves a “botar unha man” á Xunta de Galicia no deseño do novo modelo de residencias de maiores, para o que, advertiu, a institución provincial é “un bo espello no que mirarse”.

Durante a súa comparecencia na Comisión de Economía do Parlamento para presentar os orzamentos da institución para 2021, o presidente provincial puxo en valor o modelo residencial da deputación. Trátase, dixo, dun “modelo centrado nas persoas” e “non no negocio“, cunha “media de 30 usuarios por centro” e un cociente que “supón case un traballador” por interno.

Do mesmo xeito, subliñou que todos os centros da Deputación -catro residencias- “están libres de covid a día de hoxe”, algo que atribúe “sobre todo ao bo traballo do persoal”, así como “aos protocolos” que se aplican, “que son máis esixentes que os da normativa autonómica”.

O modelo de residencias, dixo Tomé Roca, “é clave para garantir o benestar das persoas maiores”, así como barreira de protección contra a covid-19, xa que “os beneficios van en detrimento de a calidade cara ás persoas”.

“URXENTE” CAMBIAR O MODELO

Por iso, o presidente provincial asegurou que é “urxente” que a Xunta “revise e implante” un novo modelo residencial, un proceso que xa foi anunciado por parte dos responsables autonómicos. “Podémoslle botar unha man, somos un bo espello no que mirarse”, dixo Tomé Roca, que se puxo “a disposición” do presidente galego, Alberto Núñez Feijóo, para “mostrarlle como funcionan” as residencias que dependen da institución. “Téndolle a man para colaborar”, engadiu.

Neste ámbito, para o próximo ano, a Deputación márcase como obxectivo duplicar os centros e prazas de atención a maiores. Así, aos actuais centros residenciais de Ribadeo, Trabada, A Fonsagrada e Pol, sumásense os de Castroverde, Pedrafita, Meira e Navia.

ORZAMENTOS SOCIAIS

A Deputación de Lugo terá en 2021 un orzamento global de 92 millóns e medio de euros, un 1% máis que en 2020, especificou Tomé Roca, que puxo en valor a “medida simbólica” da conxelación dos soldos da institución o próximo ano. As liñas de traballo articularanse en catro alicerces: as políticas sociais e de emprego, a cooperación cos concellos, en apoio aos sectores produtivos e a mellora da mobilidade provincial.

No primeiro ámbito, José Tomé defendeu o “reforzo dos servizos públicos universais, gratuítos e de calidade” e apuntou a extinción do último “chiringuito” da institución provincial, Suplusa.

SECTORES ESTRATÉXICOS E MOBILIDADE

As contas da Deputación destinan fondos para os “sectores estratéxicos” da provincia, como é o caso das partidas para ámbito agrogandeiro, forestal e do mar, que soben un 13%, ata os 2,3 millóns, para diversificar a produción, a competitividade e xerar valor engadido. Fronte a iso, criticou José Tomé, a Xunta achega en 2021 a cantidade “ridícula” de 150.000 euros para este ámbito na provincia. En canto aos fondos para o turismo, aumentan un 10%, ata os 3 millóns de euros.

Finalmente, as contas para o próximo ano aumentan un 14%, ata os 16 millóns de euros, os fondos para mellora de estradas provinciais, a rede “máis extensa de todo o territorio español”.

O PP VE AS CONTAS “DECEPCIONANTES”

Durante a súa quenda de intervención, o deputado do PPdeG Daniel Veiga cualificou as contas da institución como “decepcionantes”, xa que, “a pesar de que crecen, o investimento diminúe en tres millóns de euros”. Do mesmo xeito, considerou, están “fóra da realidade”, dado que “non dedican ningún recurso” á loita contra a pandemia e “non hai un plan covid nesta provincia”.

Daniel Veiga acusou ao goberno bipartito da deputación de “ser incoherente”, por “defender un sistema público de residencias” pero, dixo, “logo privatizar e externalizar servizos”. Tras acusar a Tomé Roca de acudir ao parlamento a “exercer de oposición á Xunta”, instoulle a “pedir perdón ao comité clínico” por “faltarlle ao respecto” falando de “decisións políticas”.

Pola contra, a deputada socialista Patricia Otero cargou contra a Xunta, que “moito fala de respectar a autonomía local, pero recórtalles constantemente os recursos”. “É a política de eu convido, ti pagas”, dixo Otero, que acusou tamén ao Goberno galego de “seguir enchufando competencias impropias” aos municipios.

Do mesmo xeito, Patricia Otero afeou á Xunta unha “falta absoluta de comunicación e transparencia” durante a pandemia e instou ao Goberno a “non desaproveitar” a “man tendida” da Deputación de Lugo para colaborar no deseño do novo modelo de residencias.

Finalmente, a nacionalista Carme Aira recoñeceu o traballo no ámbito dos servizos sociais que se fai desde esta institución, aínda que, lembrou, o BNG considera as deputacións “órganos anacrónicos que non responden as necesidades” de Galicia.

En particular, Aira cualificou de “moi adecuado” o modelo de residencias de maiores, así como a súa distribución no territorio, aínda que animou á Xunta a “facerse cargo destes centros”, que “son a súa competencia”.

ÚLTIMAS

Obradoiros de coiro, cerámica e teares para celebrar os ‘Días Europeos da Artesanía’

A Vicepresidencia da Deputación de Lugo, a través da área de Artesanía, súmase á...

Coñecemos á ‘Galiartesá’, Pepa Lombao, oleira de Bonxe

O Galicia Confidencial presenta a serie 'Galiartesáns e galiartesas' coa que procura visibilizar diferentes oficios artesáns...

O Concello de Lugo defende que os recursos empregados no Ceao foron “suficientes”

A concelleira de Cohesión Social de Lugo, Ana González Abelleira, saíu ao paso das...

Bombeiros dá por extinguido o incendio no polígono de O Ceao e a Policía Científica inicia a súa investigación

Bombeiros de Lugo deu por extinguido este mércores o incendio que calcinou na xornada...