O goberno provincial acusa a Feijóo de non compartir cos alcaldes os datos da pandemia

José Tomé critica que Feijóo "pecha municipios con datos moito mellores que outros" onde goberna o PP

Pleno provincial do 24 de novembro de 2020 na Deputación de Lugo | LX

O goberno da Deputación de Lugo, formado polo PSdeG e o BNG, acusou o presidente da Xunta de Galicia de falta de transparencia no que respecta aos datos do coronavirus. Aféanlle a Alberto Núñez Feijóo que non comparta información cos alcaldes da provincia, “que se enteran pola prensa” da evolución da pandemia no seu municipio.

En declaración previas ao pleno provincial deste martes, o presidente da Deputación, José Tomé, xa anunciaba este asunto que máis adiante se abordaría na sesión ordinaria. Tomé lembrou que Feijóo “asistía encantado” ás reunións semanais que o Goberno de España convocaba todos os domingos durante o primeiro estado de alarma, pero “resulta que el non fai ningunha nin cos presidentes dos gobernos provinciais, nin cos alcaldes nin co presidente da Fegamp”.

Ademais, segundo Tomé, Feijóo é “capaz de pechar municipios con datos moito mellores ue aqueles nos que goberna o seu partido”. “Todos os alcaldes, sexan do partido que sexan, teñen dereito a ter información que afecte o seu concello”, sinalou.

Tanto socialistas como nacionalistas criticaron a xestión de Feijóo durante a pandemia, do que din que dende que recuperou as competencias “deixou de dar roldas de prensas” e comparecencias diarias na Televisión de Galicia.

MANIPULACIÓN NA TVG

De feito, o pleno tamén incluía unha moción a fío da situación da CRTVG, onde o colectivo de traballadores ‘Defende a galega’ levan dous anos con protestas contra as presións e manipulación neste ente público.