Vox denuncia o delegado do Goberno pola manifestación antifascista en Lugo

A formación indica no escrito que tanto Abascal como cargos públicos, afiliados e simpatizantes "foron increpados e vexados" polos participantes dunha concentración que se celebraba no mesmo lugar.

No primeiro plano, asistentes ao mitin de Vox; no fondo, a concentración antifascista que recibiu a Santiago Abascal e ao resto de representantes de Vox | ALX

Vox interpuxo unha denuncia ante o Xulgado de Instrución de Lugo contra o delegado do Goberno en Galicia, Javier Losada; a subdelegada en Lugo, María Isabel Rodríguez; Acción Antifascista de Galicia e quen resulten identificados por “alterar gravemente a orde” no mitin electoral do pasado venres en Lugo, segundo informou a formación.

O partido presidido por Santiago Abascal solicita que se admita a denuncia por delito electoral, contemplados nos artigos 146.1.b) e 147 da LOREG; alteración da orde pública, do artigo 557 bis CP, en relación cun delito de odio; omisión do deber de perseguir delitos, do artigo 407 ao 409 do Código penal; prevaricación, artigo 404 do Código Penal; e tráfico de influencias do artigo 428 do Código Penal.

O escrito fai referencia ao mitin que Vox celebrou o pasado venres 3 de xullo en Lugo, onde tanto Abascal como cargos públicos, afiliados e simpatizantes “foron increpados e vexados” polos participantes dunha concentración que se celebraba no mesmo lugar e desde a que os asistentes insultaron ao berro de “fascistas nunca máis” ou “fillos de puta”. Ademais, segundo asegura a formación, os grupos antifascistas lanzaron petardos de fume.

A denuncia especifica que no lugar se atopaba a Policía Nacional, pero “non recibiu ordes das autoridades para evitar que se inxuriase e calumniara aos asistentes ao acto de campaña legalmente organizado por este partido político”.

Vox asegurou que a contramanifestación fora organizada por grupos “radicais e violentos” e sobre a que estaba ao tanto a subdelegada do Goberno en Lugo, quen “a permitiu, a pesar de coñecer as circunstancias que rodean ambos os actos”. Iso indica, explica o escrito, “que se produce unha decisión administrativa contraria a dereito e a propósito”.

No caso do mitin celebrado o mesmo venres en Vilagarcía de Arousa, Vox destacou que tamén se autorizou unha convocatoria por outra organización e o acto transcorreu “entre os berros, insultos, ameazas e alteracións de orde”. Por iso, lembrou no seu escrito que as contramanifestaciones foron anunciadas polos seus promotores nas redes sociais e, por iso, a formación presentou escritos ás Xuntas Electorais correspondentes, así como á Xunta Electoral de Galicia.

Neste sentido, a vicesecretaria Xurídica de Vox, Marta Castro, considera na denuncia que “non resulta lóxico nin tampouco responsable que o delegado do Goberno autorizase e mantivese a celebración de manifestacións ou actos no mesmo lugar no que se autorizou a celebración do mitin político de Vox”.

Ante esta situación, a formación solicita que se proceda ao interrogatorio dos denunciados e ás persoas que sexan identificadas os vídeos achegados ao xulgado por esta formación.