Caballero arrinca en Lugo co compromiso de intervir Alcoa San Cibrao

Asegurou que o voto ao PSdeG garante o "único cambio posible" e "progresista".

O candidato do PSdeG á Presidencia da Xunta, Gonzalo Caballero, xunto a cargos socialistas en Lugo. PSDEG

O candidato do PSdeG á Presidencia da Xunta, Gonzalo Caballero, comprometeuse “a contribuír co Goberno de España a intervir” a planta de Alcoa en San Cibrao se é necesario para darlle viabilidade. Garantiría así, dixo, que unha planta estratéxica para o sector do aluminio en España non peche polos intereses dunha multinacional que “non quere manter a súa actividade produtiva” e que “quere pechar as portas a posibles competidores”.

Acompañado pola alcaldesa de Lugo, Lara Méndez e o presidente da Deputación, José Tomé, nun paseo en Lugo antes de manter unha reunión cos alcaldes socialistas da comarca da Mariña para abordar a situación desta planta, Gonzalo Caballero asegurou que é necesario deixarlle “as cousas moi claras” a esta compañía.

“Se Alcoa queda terá un goberno amigo en Madrid e en Galicia, pero se se quere ir terá que facer fronte ás indemnizacións por abandonar a planta. Ten que cumprir cos requisitos ambientais polos lodos e obrigarémoslle a que abra as portas e a que ceda as instalacións a proxectos de investimento que garantan a viabilidade da empresa”, manifestou.

Sobre este punto, o tamén secretario xeral dos socialistas galegos detallou que hai dous investidores que xa mostraron o seu “interese e a capacidade” para darlle un futuro á planta situada no municipio lucense de Xove.

FONDO DE GARANTÍAS

Así mesmo, na súa intervención detallou que este mesmo venres o Consello de Ministros aprobará o fondo de garantías para as empresas electrointensivas, medida que cualificou de “avance fundamental” para camiñar cara ao novo estatuto de consumidores electrointensivos.

Ademais, lembrou que a Xunta ten a capacidade de tramitar o ERE que poida presentar Alcoa para esta planta e lembrou que o Executivo socialista do Estado tardou só seis meses na tramitación do exposto pola multinacional na Coruña.

Todo iso nunha intervención na que criticou que en 11 anos de goberno Feijóo non fixese política industrial nin achegase solucións a ningún tema importante da industria galega. “Para darlle solución ás necesidades da industria galega é necesario un presidente con capacidade e coñecemento económico para afrontar unha folla de ruta para a reconstitución do noso país”, manifestou.

O PSDEG, “ÚNICO CAMBIO POSIBLE”

Na súa visita a Lugo, Caballero presentou o PSdeG como a garantía do cambio político, que “só é posible” se o proxecto vai liderado por esta formación. “Cada voto ao PSdeG vai ser un voto cun efecto multiplicador para o cambio, porque vai reforzar a maioría do progreso no próximo Parlamento de Galicai”, apuntou.