O presidente da Xunta de Galicia e candidato do PP á reelección, Alberto Núñez Feijóo, anunciou o relevo de trece altos cargos que pasarán a formar parte das listas do PPdeG ás autonómicas do vindeiro 5-A. No caso de Lugo, cesa o delegado territorial da Xunta, José Manuel Balseiro; e mais a secretaria xeral de Igualdade, Susana López Abella, que se dan por fixos en postos de saída pola provincia lucense.
Ás portas de que conclúa o prazo para o rexistro das listas para a cita coas urnas, o vindeiro luns 2 de marzo, Feijóo informou de modificacións que afectan aos delegados territoriais de distintas cidades, así como a varios directores e directoras xerais, como consecuencia da súa “previsible incorporación” ás candidaturas populares. O seu cesamento, “por un criterio de prudencia”, publicarase no Diario Oficial de Galicia do próximo luns.
Estes cambios obrigarían a recompoñer o esquema dun Goberno galego descabezado. Podes ler a información completa no Galicia Confidencial.