O pleno da Deputación arrinca cun breve desencontro a fío do comité de Alcoa, que levou as súas protestas á sala

Os traballadores da fábrica de San Cibrao desprazáronse ata Lugo para pedir nunha manifestación o abaratamento da electricidade. As súas protestas tamén se fixeron oír na grada do salón de plenos e provocaron un 'tira e afrouxa' entre José Tomé e Elena Candia.

Traballadores de Alcoa expresan a súas protestas no salón de plenos da Deputación provincial | Servizos Audiovisuais da Deputación

A sesión ordinaria convocada para este mércores 26 de febreiro no Pazo de San Marcos arrincou cun breve ‘tira e afrouxa entre o presidente da Deputación, José Tomé, e a popular Elena Candia a fío das protestas do comité de Alcoa-San Cibrao. Decenas de traballadores irromperon no edificio, onde foran recibidos polo propio Tomé, mais abandonaron a sala trala intervención do persoal de seguridade.

No salón de plenos, José Tomé daba comezo á sesión media hora máis tarde do previsto por mor dos pitidos e consignas proferidas por traballadores de Alcoa, que se desprazaran á cidade para unha manifestación que rematou diante da Deputación. “Apoiamos as reivindicacións dos traballadores de Alcoa, pero pedimos que nos permitan desenvolver o pleno con normalidade”, sostivo o presidente.

A presidenta do PP provincial, Elena Candia, interrompeu daquela a Tomé para trasladarlle unha petición sobre ese mesmo tema. “Tendo en conta que na orde do día hai un asunto que afecta a estas persoas que se desprazaron á capitalidade, prego que convide o comité a que asista á sesión plenaria e que se invirta a orde do día”, dixo.

Malia que o presidente socialista afirmou comprender as protestas dos traballadores, non se parou demasiado neste punto. “Entendo que os plenos son públicos, pode asistir calquera, tamén os comités de empresa. Sen pancartas e sen ruído poden estar. Doutra maneira non, como é normal”, chantou, para engadir que non había razón para alterar a orde do día. A contestación non foi recibida con agrado por parte de Elena Candia: “Desentende a nosa petición entón?”, repetiu en varias ocasións, con ton serio e case desafiante.

ALCALDE DE CASTROVERDE

A pesar de que a sesión continuou sen facer máis alusión a ese tema ata chegar o momento de tratalo explicitamente —nunha moción do PP—, o alcalde de Castroverde, Xosé María Arias, retomou a leve polémica un anaco máis tarde. Durante a súa intervención acerca do plan de melloras de camiños, o socialista parabenizou a José Tomé pola súa “templanza” á hora de responder a Elena Candia e deixou caer certa dose de crítica respecto de “aqueles que se poñen detrás dunha pancarta por primeira vez”. “Outros estamos sempre”, asegurou.

 

DEIXAR UN COMENTARIO

Please enter your comment!
Please enter your name here