Alcaldes socialistas protestan ante a Xunta polo “drástico recorte” no plan de mellora de camiños

Os representantes do PSdeG criticaron o "abandono rural" durante a lexislatura de Feijóo.

Protesta de alcaldes socialistas en Lugo para denunciar o abandono do rural.

A práctica totalidade dos alcaldes socialistas da provincia de Lugo, así como a secretaria provincial do PSdeG, Patricia Otero, concentráronse este luns ante a delegación da Xunta para denunciar o “abandono” do rural por parte do goberno de Alberto Núñez Feijóo.

Na protesta, Otero criticou o “drástico recorte no plan marco de camiños da Xunta de Galicia para os anos 2020 a 2021″ e asegurou que este tipo de axudas minguaron en máis de “1 millón de euros” na nosa provincia. Segundo as súas estimacións, “pásase de 5’3 millóns na anualidade de 2016 a 3 millóns nas anualidades de 2020-2021″.

A líder dos socialistas lucenses argumentou que “o recorte no conxunto de Galicia desde o 2016 ata as anualidades de 2020 e 2021 é “dun 70%”. “Trátase dunhas axudas para fixar poboación no rural, para vertebrar o territorio e chegar a explotacións gandeiras”, remarcou.

“Feijóo dixo que esta lexislatura era a do rural, pero convértese nun verdadeiro abandono para o mundo rural”, manifestou Patricia Otero, que sostivo que os recortes tamén se ven na “sanidade” e na “educación“. “Están a recortarse profesionais e servizos nos centros de atención primaria. Xa non só nos hospitais comarcais”, recriminou.

“CATRO ANOS MÁIS DE CAMPAÑA”

O alcalde de Castroverde, Xosé María Arias, que se erixiu en portavoz do resto de alcaldes, ironizou con que “a lexislatura do rural comeza aquí outra vez, con catro anos máis de campaña de Feijóo”.

Estamos na era dos drons e dos coches voadores e aínda lle pide aos alcaldes que busquen sitio para pór antenas de telefonía rural”, asegurou o rexedor, que afirmou que o que fixo Feijóo por Galicia se traduce en “recortes e recortes” e “campañas publicitarias cada catro anos”. “Que abandone toda esta propaganda”, desvirtuou.

Finalmente, o alcalde de Castroverde fixo un chamamento “ás xentes das cidades” para que tamén “se mobilicen”. “Feijóo ten que ter suxeita a Galicia na miseria e na fame negra, por non dicir outra cousa, porque nin antenas de teléfono temos”, resolveu.