Controlar o acceso de tráfico ao centro mediante cámaras: “insuficiente” a ollos do PP

Antonio Ameijide celebra esta medida, pero cre que se debería traballar tamén no regulamento da actividade de reparto, por exemplo, para reducir a "presenza masiva" de vehículos de transporte. Pide máis zonas de carga e descarga.

Coches aparcados | coches.net

O goberno local anunciou hai uns días un novo sistema para controlar o acceso de tráfico ao casco histórico: empregaranse cámaras lectoras de matrículas. Porén, dende o Partido Popular municipal ven nesta medida un simple “parche” que “non solucionará o problema real” que hai no centro da cidade.

O concelleiro popular Antonio Ameijide cre que as cámaras lectoras de matrículas son unha “boa medida”, pero —á parte de levar un ano metida nun caixón, di— é “insuficiente”. Aféalle ao Concello a súa “falta” de ambición e di que “están moi equivocados” se pensan que basta con cumprir o acordo plenario, tomado a iniciativa do PP, no que se pedía substituír os bolardos por estoutro método. “Hai que ser ambiciosos e mirar o conxunto do casco histórico en global e non só un problema en concreto”, afirmou Ameijide.

Antonio Ameijide considera que esta medida debería complementarse con moitas outras para solucionar o caos de tráfico e para non deixar un “coador” en varias zonas peonís. Di, por exemplo, que haberá moitos puntos do casco histórico que quedarán sen control, como os accesos a pé dende Bispo Aguirre, a Rúa Nova con Montevideo, ou os casos das rúas San Froilán e Amor Meilán. “Se queremos potenciar as zonas peonís e limitar o acceso do tráfico rodado a estas zonas, hai que facer un programa completo”, sentenciou.

ÁREAS DE CARGA E DESCARGA

Refírese, en concreto, á necesidade de implantar un plan de circulación consensuado coa veciñanza e comerciantes para eliminar o “malestar” que provoca a presenza masiva de vehículos de transporte. Cómpre “regular mellor a actividade de reparto”, propón Ameijide, quizais habilitando máis espazos de carga e descarga. 

DEIXAR UN COMENTARIO

Please enter your comment!
Please enter your name here