O fillo de González Capón será investido como novo alcalde este mércores

O ex rexedor faleceu o pasado luns por causa dunha enfermidade. Levaba 32 anos á fronte do goberno local

O ex-alcalde de Baralla, Manuel González Capón / La Sexta

O Concello de Baralla acollerá este mércores o pleno de investidura do concelleiro popular Miguel González, que pasará a ser o novo alcalde. Trátase do fillo do ex rexedor Manuel González Capón, falecido por mor dunha enfermidade o pasado luns, tres días despois de presentar a súa dimisión.

Miguel González, quen se estreou nas pasadas eleccións como número tres da candidatura popular, será nomeado alcalde nun pleno que se celebrará ás 13.30 horas. O novo rexedor sucederá deste xeito ao seu pai, que posuía o bastón de mando desde 1987. Tamén nos comicios locais do pasado maio conseguira unha ampla maioría absoluta, con 8 dos 11 concelleiros do pleno, fronte aos dous conseguidos polo PSOE e un do BNG.

A pesar de que o tenente de alcalde, Manuel Rodríguez Vilela, quedou á fronte do Consistorio tras o falecemento de González Capón, finalmente será o fillo do exalcalde o que asumirá as rendas do goberno.