O alcalde de Castroverde, Xosé María Arias, e a deputada autonómica Patricia Otero (Burela) postuláronse este mércores para dirixir o Partido Socialista na provincia de Lugo tras o proceso interno aberto coa dimisión de Álvaro Santos como secretario provincial.
Os dous rexistraron as súas precandidaturas na sede do PSOE de Lugo este mércores, xornada na que finaliza o prazo para inscribirse nestas primarias. Agora teñen cinco días para recoller os avais necesarios para converterse en aspirantes á secretaría provincial.
En concreto, segundo indicaron fontes do partido, necesitan entre o 3% e o 6% de avais dos case 1.900 afiliados do PSOE na provincia. No caso de que ambas candidaturas saian adiante, o sábado día 20 de xullo terá lugar a votación, unha semana antes da data fixada para o Congreso provincial -27 de xullo- que programou a xestora presidida por José Antonio Quiroga, secretario de Organización do PSdeG.
Tanto o alcalde de Castroverde como a deputada Patricia Otero xa se presentaran hai dous anos ás primarias do PSOE provincial, unhas votaciós nas que Álvaro Santos se impuxo como secretario dos socialistas lucenses. Ademais, mentres que Patricia Otero apoiou a Pedro Sánchez nas primarias á secretaría xeral do PSOE, o alcalde de Castroverse sitouse do bando de Susana Díaz, tal e como lembraron fontes socialistas.
A respecto da existencia de dous precandidatos, o presidente da xestora, José Antonio Quiroga, valorou a “total normalidade” coa que se “está desenvolvendo o proceso”, así como a “disposición e compromiso” mostrado polos dous afiliados que decidiron dar un paso adiante para encabezar o partido nesta nova etapa.