O líder do PSdeG, Gonzalo Caballero, destacou este sábado os reultados “históricos” do seu partido nas eleccións xerais, locais e europeas do 26 de maio. “O PSOE foi a forza que máis creceu, que máis avanzou, logrando máis concelleiras, máis alcaldías e liderando a Galicia máis dinámica e a Galicia urbana“, dixo durante a súa intervención no Comité Nacional do seu partido.

E como exemplo do “novo poder municipal” que, para Caballero, se abre tras a cita coas urnas do pasado mes de maio, o líder do PSdeG puxo como exemplo os municipios de Forcarei (Pontevedra) e Vilalba (Lugo), feudos históricos dos populares galegos e que pasarán a estar gobernados, previsiblemente, polas socialistas Verónica Pichel e Elba Veleiro, respectivamente.

Caballero detívose no municipio lucense de Vilalba, lugar de nacemento do expresidente da Xunta Manuel Fraga e onde o fundador de Alianza Popular “dicía que empezaba todo”. “En Vilalba empezaba todo e alí termina todo“, proclamou o secretario xeral dos socialistas galegos.