Ramón González Rey | Estes días de confinamento por mor do coronavirus, o humor sácanos do tedio. Perdomo e Touriñán improvisan nas redes sociais, os memes multiplícanse e Pantomima Full sácanlle punta a todo, pero ao final con quen máis te ris é con eses amigos que teñen unha retranca que che fai doer a barriga. E entre os centos de Whatsapps que tes por ler sempre hai algún que che fai unha sesión de abdominais gratuíta, sen moverte do sofá. Como diría un colega, esa xente auténtica, que sorprende cada día por moito que a coñezas, é “a alma“.

Entre a comunidade educativa da clase Simba de terceiro de primaria do Ceip Caselles Rollán de Xove a alma é Albano Riveira Paleo.

Todos as noites, entre as 22.00 e as 23.00 horas, as familias están pendentes do móbil. Pais e crianzas agardan por unha rutina, bendita rutina, que leva animándolles a corentena desde a primeira prórroga do estado de alarma: o whatsapp de Albano.

No grupo de whatsapp para enviar tarefas ou exercicios acabouse coando momento de relaxación, que, aseguran as familias, vale ouro. “Uns días é un truco de maxia, outros unha imitación, outras veces colle cancións e cámbialles a letra, como fixo con ‘20 de abril‘, disfrázase, baila, fai cousas para os pícaros…”