O Goberno galego aprobou este xoves a declaración dos Lagos de Lousada, en Xermade (Lugo), como espazo privado de interese natural (EPIN), unha figura de protección pensada para áreas en mans de particulares nas que existen formacións naturais, especies ou hábitats de flora e fauna silvestres.
De igual modo, este EPIN recibiu o visto e prace ao decreto que aproba o seu plan de conservación, co obxectivo de obter a declaración definitiva que asenta as bases técnicas para preservar os principais valores naturais da área.
En concreto, o dos Lagos de Lousada é o segundo EPIN de Galicia, despois de que en 2011 o espazo natural das Sobreiras do Faro, en Oia (Pontevedra), recibise este distintivo.
Todas as actuacións previstas, entre as que se inclúen a eliminación de especies invasoras e a prevención fronte ao risco de incendios, terán un custo global de 13.000 euros que serán financiados polos propietarios dos terreos.