Sen signos de contaminación no río Rato a pesar dos 14.000 litros de xurro que verteu un gandeiro

O infractor foi sorprendido por axentes ambientais e agora enfróntase a unha multa de entre 25.000 e 150.000 euros. A Confederación Hidrográfica Miño-Sil analizou tres mostras do caudal, que confirman que "está limpo".

O río Rato ó seu paso polo Parque de Paradai (Guido Álvarez Parga)
O río Rato ó seu paso polo Parque de Paradai (Guido Álvarez Parga)

A Confederación Hidrográfica Miño-Sil asegurou, en resposta a unha consulta de Europa Press, que o río Rato, en Lugo, “está limpo” a pesar dos 14.000 litros de xurro vertidos por un gandeiro o pasado sábado a esta canle fluvial.

A Confederación sacou este luns mostras da auga en tres zonas distintas da canle que, unha vez analizadas, non deron signos de contaminación. Ademais, “tampouco se notificou mortaldade de peixes”. Con todo, o organismo indicou que farán máis test nos próximos días.

Tal e como confirmou a confederación, os feitos foron denunciados por axentes ambientais da Xunta, que sorprenderon a un gandeiro mentres baleiraba, por segunda vez, unha cisterna con residuos orgánicos ao río Rato, unha acción coa que vertería uns 14.000 litros de xurro á canle fluvial.

O infractor, identificado por persoal da Xunta, foi denunciado ante os servizos xurídicos da administración autonómica en Lugo. Esta infracción, de ser cualificada de ‘moi grave’, levaría unha sanción de entre 25.000 e 150.000 euros.

A vertedura, con todo, non causou mortaldade entre as poboacións de peixes do río, debido en parte ás intensas choivas rexistradas nos últimos días, que aumentaron “notablemente” o caudal do río, o que axudou a minimizar os danos.  No río Rato habita o ‘gasterosteus aculeatus’, máis coñecido como ‘espiñento’ ou ‘picón’ en galego, unha especie pouco abundante nos ríos galegos e que está catalogada como “vulnerable”.