A rehabilitación da Casa Torre da Tinería estará rematada no 2021

O Hospital de San Miguel, como tamén se coñece este edificio, será destinado a usos turísticos e hoteleiros.

Hospital medieval de San Miguel | Google
Hospital medieval de San Miguel | Google

As obras de rehabilitación da Casa Torre, tamén coñecida como o Hospital de San Miguel, no barrio da Tinería de Lugo, será unha das primeiras actuacións do Plan de reactivación deseñado pola Consellería de Medio Ambiente, Territorio e Vivenda para loitar contra as consecuencias económicas e sociais que deixou a COVID-19.

A conselleira de Medio Ambiente, Territorio e Vivenda, Ángeles Vázquez, visitou Lugo na mañá deste martes para presentar o proxecto desde a propia muralla lucense, onde se localiza a Casa Torre, un edificio no que se investirán 610.000 euros para a súa rehabilitación. O prazo de execución é de oito meses e o contrato de licitación está aberto ata o día 23 de xuño.

O inmoble destinarase a usos relacionados coa potenciación dos recursos turísticos e gastronómicos da provincia de Lugo e a conselleira cualificouno “como a alma máter” da zona da Tinería. Ángeles Vázquez tamén resaltou que o edificio será como “un museo aberto, vivo” no que se poderá gozar da Muralla lucense, o que supón, en palabras da conselleira, “unha gran noticia para Lugo”.

Así mesmo, a Asociación de Empresarios de Hostalaría e Turismo contará cun novo espazo no edificio. Ademais, a propia Casa Torre terá cun pequeno paseo interior pola muralla lucense e albergará a nova oficina de turismo da Xunta de Galicia na cidade lucense.

DEIXAR UN COMENTARIO

Please enter your comment!
Please enter your name here