O presidente da Confederación Hidrográfica Miño Sil, José Antonio Quiroga, trasladou á alcaldesa de Lugo, Lara Méndez, nunha reunión mantida este luns, a obra que acometerá a Confederación a próxima semana, nas beiras do río Miño ao seu paso pola cidade.
En concreto, trátase dunha actuación de urxencia na zona do barrio da Ponte, para evitar a deterioración do ‘caneiro do Muiño’ e como medida de protección do río. Vaise a realizar un dique de 36 metros de longo e 4 metros de alto, cun investimento de 85.000 euros.
Quiroga puntualizou que, polo momento, “é o único que se pode acometer na zona”, porque están pendentes dunha decisión xudicial para iniciar o proxecto orzado en máis de 300.000 euros e que daría solución á deterioración do caneiro.
Doutra banda, a alcaldesa anunciou que o Concello está pendente do permiso definitivo para que o ano que vén a cidade poida contar coa praia fluvial. Trátase da última fase desta obra para lograr unha integración do Miño na cidade, que a rexedora espera que sexa “unha realidade inmediata”.